திருவாசகம் - பொய் கெட்டு மெய் ஆனார் - பாகம் 2
"வேறு வேறு விதமாக இருக்கும் உடம்பினுள் என்னால் இருக்க முடியாது. ஐயா ! அரனே ! என்று போற்றி புகழ்ந்து, பொய்யானவெல்லாம் கெட மெய்யானவற்றை அடைந்து , மீண்டும் இங்கு வந்து வினை சேரும் இந்த பிறவியை அடையாமல், வஞ்சனையைச் செய்யும் இந்த புலன்களிடம் கிடந்து அகப்படாமல் என்னை காப்பவனே; நள்ளிருளில் நடனம் ஆடுபவனே."
பாடல்
வேற்று விகார விடக்குடம்பி னுட்கிடப்ப
ஆற்றேனெம் ஐயா அரனேயோ என்றென்று
போற்றிப் புகழ்ந்திருந்து பொய்கெட்டு மெய்யானார்
மீட்டிங்கு வந்து வினைப்பிறவி சாராமே
கள்ளப் புலக்குரம்பைக் கட்டழிக்க வல்லானே
நள்ளிருளில் நட்டம் பயின்றாடு நாதனே
பொருள்
வேற்று = வெவேறு விதமான
விகார = வடிவங்கள் கொண்ட
விடக்குடம்பி னுட்கிடப்ப = ஊனாலான இந்த உடம்பினுள் கிடக்க
ஆற்றேனெம் ஐயா = ஆற்றமாட்டேன் என் ஐயா
அரனேயோ என்றென்று = அரனே என்று என்று
போற்றிப் புகழ்ந்திருந்து = போற்றி புகழ்ந்திருந்து
பொய்கெட்டு மெய்யானார் = பொய்யை விடுத்து மெய்யை அடைந்தார்
மீட்டிங்கு வந்து = மீண்டும் வந்து இங்கு
வினைப்பிறவி சாராமே = வினைக்கொண்ட இந்த பிறவியை அடையாமல்
கள்ளப் புலக்குரம்பைக் = கள்ளம் செய்யும் இந்த புலன்களின்
கட்டழிக்க வல்லானே = கட்டை அழிக்க வல்லவனே
நள்ளிருளில் = நடு இரவில்
நட்டம் = நடனம்
பயின்றாடு நாதனே = பயின்று ஆடும் நாதனே !
போற்றிப் புகழ்ந்திருந்து பொய்கெட்டு மெய்யானார்
சரி எது, தவறு எது ?
நல்லது எது, கெட்டது எது ?
நல்லவர் யார் , கெட்டவர் யார் ?
எது சரியான பாதை, எது தவறான பாதை ?
என்று தெரியாமல் பல தவறான முடிவுகளை எடுத்து விட்டு தவிக்கிறோம்.
பொய்யானவற்றை விட்டு உண்மையானவற்றை அடைய வேண்டும்.
பொய் என்பது பொய் அறிவு, பொய் உணர்வு.
மெய் என்பது மெய் அறிவு, மெய் உணர்வு.
எப்பொருள் யார் யார் வாய் கேட்பினும் , அப்பொருள் மெய் பொருள் காண்பது அறிவு என்பார் வள்ளுவர்.
எப்பொருள் எத்தன்மையத் தாயினும் அப்பொருள் மெய்பொருள் காண்பது அறிவு என்பதும் அவர் வாக்கே.
இறைவனை அறியும் போது பொய் விலகும், உண்மை புரியும்.
யார் என்ன சொன்னாலும், நாமே ஆராய வேண்டும் என்று சொன்னால், மாணிக்க வாசகரின் கூற்றையும் ஆராய வேண்டாமா? சும்மா அவர் சிவன் மேல் பாடுவதெல்லாம் சரி என்று எப்படிக் கொள்ள முடியும்?!
ReplyDelete