தேவாரம் - பிறவா நாள்

தேவாரம் - பிறவா நாள் 

திரு பாதிரிப் புலியூர்.

கடலூர் மாவட்டத்தின் தலை நகர்.

புலிக்கால் முனிவர் பூஜை செய்த தலம்.

திரு நாவுக்கரசரை கல்லில் கட்டி கடலில் போட்ட இடம்.

"சொற்றுணை வேதியன்" என்ற நமச்சிவாய பதிகம் பாடி, அந்த கல் தெப்பமாக மாற, அதில் மிதந்து கரை ஏறி வந்தார்.

இன்றும் "கரை ஏற விட்ட குப்பம்" என்ற இடம் கடலுருக்கு அருகில் உள்ள தேவனாம்பட்டினம் என்ற கடற் கரையில் உள்ளது.

அங்கே நாவுக்கரசருக்கு ஒரு கோயில் இருக்கிறது.


நாவுக்கரசர் சொல்கிறார்....இறைவனைப் பற்றி பேசாத நாள் எல்லாம் பிறவாத நாள் என்கிறார்.





அரியானை அந்தணர்தம் சிந்தை யானை
அருமறையின் அகத்தானை அணுவை யார்க்கும்
தெரியாத தத்துவனைத் தேனைப் பாலைத்
திகழொளியைத் தேவர்கள்தங் கோனை மற்றைக்
கரியானை நான்முகனைக் கனலைக் காற்றைக்
கனைகடலைக் குலவரையைக் கலந்து நின்ற
பெரியானைப் பெரும்பற்றப் புலியூ ரானைப்
பேசாத நாளெல்லாம் பிறவா நாளே.


அரியானை = அறிந்து கொள்வதற்கு கடினமானவனை

அந்தணர்தம் சிந்தை யானை = அந்தணர்களின் சிந்தனையில் இருப்பவனை

அருமறையின் = அறிய பெரிய வேதங்களின்

அகத்தானை = உள் இருப்பவனை

அணுவை = அணுத் துகளை

யார்க்கும் = யார் ஒருவரும்

தெரியாத தத்துவனைத் = தெரியாமல் வைத்த தத்துவனை

தேனைப் = தேன் போன்று இருப்பவனை

பாலைத் = பால் போன்றவனை

திகழொளியைத் = திகழும் ஒளி போன்றவனை

தேவர்கள்தங் கோனை = தேவர்களின் தலைவனை (கோ = தலைவன்)

மற்றைக் = மற்றும்

கரியானை = கரிய நிறம் கொண்ட திருமால்

நான்முகனைக் = பிரமன்

கனலைக் = தீ

காற்றைக் = காற்று

கனைகடலைக் = அலையும் கடல்

குலவரையைக் = பெரிய மலை

கலந்து நின்ற = இவற்றை எல்லாம் கலந்து நின்றானை

பெரியானைப் = பெரியவனை

பெரும்பற்றப் புலியூ ரானைப் = புலி கால் முனிவர் பூசித்த திருப்பாதிரிப் புலியூரில் உள்ளவனை

பேசாத நாளெல்லாம் பிறவா நாளே. = பற்றி, பேசாத நாள் எல்லாம் பிறவாத
நாளே

பிறவாத நாள் எல்லாம், வாழாத நாள் தானே ?