திருக்குறள் - களவின் கண் கன்றிய காதல்

திருக்குறள் - களவின் கண் கன்றிய காதல்


அளவின்கண் நின்றொழுகல் ஆற்றார் களவின்கண் 
கன்றிய காத லவர்.

முதலில் கோனார் தமிழ் உரை - களவின் (திருட்டு) மேல் நாட்டம் உள்ளவர்கள் எதையும் ஒரு அளவோடு செய்ய மாட்டார்கள். 

இப்படித்தான் மற்றவர்களும் உரை எழுதி இருக்கிறார்கள்.

கொஞ்சம் ஆழமாக சிந்திப்போம் 

அளவின்கண் நின்றொழுகல் ஆற்றார் = அளவோடு நின்று வாழ மாட்டார்கள். 

என்ன அளவு ? எதை அளக்க வேண்டும் ?

எந்த அளவுக்கும் ஒரு அடிப்படை வேண்டும். ஒரு மீட்டர், ஒரு வினாடி, ஒரு கிலோ என்று அடிப்படை அலகு (UNit ) வேண்டும். அதை வைத்து மற்றவற்றை அளக்கலாம். எத்தனை கிலோ, எத்தனை மணி என்று அளக்க முடியும். 

வாழ்க்கைக்கும் ஒரு Unit இருக்கிறது . ஒரு நெறிமுறை , கோட்பாடு, சட்ட திட்டம் இருக்கிறது. 

அந்த நெறிப்படி வாழ மாட்டார்கள், மனம் போன படி வாழ்வார்கள் - யார் ?

களவின் மேல் கன்றிய காதலவர் - அது என்ன கன்றிய காதல் ? கன்றிய என்றால் மிகுந்த ஈடுபாடு உள்ளவர்கள். முதலில் தேவைக்காக செய்த களவு நாளடைவில் அதுவே வாழ்க்கை என்று ஆகி, அதை விட முடியாமல், அதன் மேல் மிகுந்த ஈடுப்பாடு உள்ளவர்கள் வாழ்க்கை நெறி முறைகளை கடை பிடிக்க மாட்டார்கள். 

அப்படி என்றால், அவர்கள் களவு மட்டும் அல்ல, கொலை, கொள்ளை, கற்பழிப்பு, ஆள் கடத்தல், இலஞ்ச இல்லாவண்யம்  என்று எது எல்லாம் தவறு என்று நிர்ணைக்கப் பட்டு இருக்கிறதோ, அதை எல்லாம் செய்வார்கள்.

அதுவும் அளவு கடந்து செய்வார்கள். அவர்கள் செய்யும் கொடுமைக்கு அளவு இருக்காது.

ஆற்றார் என்றால் செய்ய முடியாது, வழியில் நிற்க முடியாது. அவர்களே நினைத்தாலும் அவர்களால் நல்ல வழியில் நிற்க முடியாது. 

ஆற்றேன் அடியேன் அதிகைக் கெடில வீரட்டானத்துறை அம்மானே என்பார் நாவுக்கரசர். என்னால் இதை பொறுக்க  முடியவில்லை என்று கண்ணீர் வடிக்கிறார்.  

 

அளவின்கண் நின்றொழுகல் ஆற்றார் களவின்கண்
கன்றிய காத லவர்.